படம் பார்த்தவர்கள் சொன்னார்கள்.. எஸ் ஜே சூர்யா தூக்கினார்..!

நீண்ட வருடங்களுக்கு பிறகு எஸ்.ஜே. சூர்யா இயக்கி, நடித்துள்ள படம் ’இசை’. இந்தப் படத்தில் எஸ்.ஜே. சூர்யாவுக்கு ஜோடியாக சாவித்ரி என்ற புதுமுக நடிகை ஜோடியாக நடிக்க சத்யராஜ் வில்லனாக நடித்துள்ளார்.

சமீபத்தில் ரிலீஸான இப்படம் ஓரளவும் நல்ல வரவேற்பை பெற்றாலும் படம் ரொம்ப நீளமாக இருப்பதாக படம் பார்த்தவர்கள் சொல்கிறார்கள். தற்போதெல்லாம் ஒரு சினிமா 2 மணி நேரம் இருந்தாலே போதும் என்று மக்கள் நினைக்க ஆரம்பித்துவிட்டார்கள். இன்னும் சொல்லப்போனால் அதே அதிகம் என்று சொல்லக்கூடிய ஒரு கூட்டமும் இருக்கிறது.

இந்த நேரத்தில் தான், பெரிய படங்கள் எல்லாம் 3 மணி நேரத்துக்கு அதிகமாக எடுத்து ரிலீஸ் பண்ணி வருகிறார்கள். ஏன் அடுத்து வரவிருக்கும் அஜித்தின் என்னை அறிந்தால் கூட கிட்டத்தட்ட 3 மணி நேரம்தான் என்று கூறப்படுகிறது.

படம் ரிலீஸுக்கு முன்பு ஒரு காட்சியைக் கூட குறைக்கவோ வெட்டவோ மனசில்லை என்று இயக்குநர்கள் சொல்லுவதும், ரிலீஸுக்கு பின்பு மக்கள் பொறுமையிழந்து நெளிவதைப் பார்த்து சில நிமிட காட்சிகளைக் குறைப்பதும் தமிழ் சினிமாவில் சமீபகாலமாகவே தொடர்ந்து வருகிறது.

சமீபத்தில் வெளியான இசை படத்திலும் இதே கதைதான். இந்தப் படம் 3 மணி நேரம் 10 நிமிடம் ஓடக் கூடிய வகையில் வெளியானது. படம் பார்த்த பலரும் படத்தின் நீளத்தை குறையாகச் சொன்னதை அறிந்து, உடனடியாக 7 நிமிடக் காட்சிகளைக் குறைத்துள்ளார் எஸ் ஜே சூர்யா.