அனேகன் - விமர்சனம்...!

மன்னர்கள் காலம், 1962, 1987, 2015 ஆகிய நான்கு காலகட்டங்களில் ஒரு காதல்இணைக்கு நேருகிற நிகழ்வுகள்தாம் கதை. தனுஷ¨ம், நாயகி அமைராவும்தான் அந்தஇணை.

இதை இந்த வரிசைப்படி அப்படியே சொல்லிவிட்டால் சுவையாக இருக்காது என்று கருதி, முன்னும் பின்னும் மாற்றிப்போட்டு தானும் குழம்பி பார்ப்பவர்களையும் குழப்பியிருக்கிறார் இயக்குநர் கே.வி.ஆனந்த்.

காணொளிவிளையாட்டுகளை (வீடியோகேம்) உருவாக்கும் நிறுவனத்தில் வேலைசெய்யும் நாயகி அமைராவுக்கு, தன்னுடைய முன்ஜென்ம நினைவுகள் அடிக்கடி வந்துவிடுகிறது.

ஒவ்வொரு பிறப்பிலும் அவர் தனுஷைக் காதலிக்கிறார். ஆனால் அது கைகூடாமல் போகிறது. கடைசியாக 2015 இல் நடக்கிற கதையிலாவது அவர்கள் சேருகிறார்களா? என்பதுதான் படம்.

இந்நான்கு காலகட்டங்களில் மன்னர் காலத்தை மட்டும் பாடல்களிலும் ஓரிருகாட்சிகளிலும் காட்டுகிறார்கள். 1962 இல் நடக்கும் கதை முழுக்க பர்மாவில் நடக்கிறது. அடுத்தகதை வடசென்னையிலும் அதற்கடுத்த கதை தென்சென்னையிலும் நடக்கிறது.

மன்னர்காலத்தில் முறுக்கியமீசையுடனும் அடர்ந்த கூந்தலுடனும் வருகிறார் தனுஷ், பர்மாவில் மீசையே இல்லாத ஆனால் தலைகொள்ளாத முடியுடன் வருகிறார், வடசென்னைக்கதையில் தலைநிறையமுடி மற்றும் தாடி மீசையுடன் வருகிறார், தறக்காலக்கதையில் ஓர் உயர்நடுத்தர வகுப்புப் பையனாக நாகரிகஉடைகள், குளிர்கண்ணாடி உட்பட சகலசம்பத்துகளுடனும் வருகிறார்.

காலத்துக்குக் காலம் தோற்றங்கள் மாறினாலும் அவருடைய நடிப்பில் மாற்றங்கள் ஏதுமில்லை. காலமாற்றங்களைப் பற்றிக் கவலைகொள்ளாமல் சண்டைகளை அமைத்திருக்கிறார்கள்.

மன்னர்காலத்தில் பறந்து உதைப்பது போலவே 2015 இலும் உதைக்கிறார். அது குற்றமாகத் தெரிந்துவிடக்கூடாது என்பதற்காக முதல்மூன்று உருவங்களையும் தற்கால உருவத்துக்குள் நுழைவதுபோலக் காட்சி வைத்துவிட்டார்கள்.

நாயகி அமைராதஸ்தூர் புதுவரவு. இவரே கதையின் மையம். இவருக்கு ஏற்படுவது முன்ஜென்ம நினைவுகளா? ஊக்கத்துக்காகக் கொடுக்கப்படும் மாத்திரைகளின் பக்கவிளைவா? அல்லது அவருக்கு ஏற்படுகிற கனவா? என்று ஏதோவொரு வகையில் வகைப்படுத்த முடியாவிட்டாலும் அவர்தான் படத்தின் மொத்தக்கதையையும் திரைக்கதையோடு சொல்கிறார். அழகாக இருக்கிறார், நன்றாக நடிக்கவும் செய்கிறார். பாடல்காட்சிகளில் சிறப்பாக நடனம் ஆடுகிறார்.

நீண்டஇடைவெளிக்குப் பிறகு நடிகர் கார்த்திக் இந்தப்படத்தில் முக்கியவேடமேற்றிருக்கிறார். காணொளிவிளையாட்டுகளைத் தயாரிக்கும் நிறுவனத்தின் அதிபராக வருகிற அவர், வேடத்துக்கேற்ப, ஆங்கிலத்தையும் தமிழையும் சேர்த்துப்பேசி சோதிக்கிறார். அவர் வந்தபிறகு படத்தில் வேகம் கூடுவதற்குப் பதில் குறைந்துவிடுவது சோகம்.

கடைசிக்காட்சிகளில் அவருடைய நடிப்பும் பேசப்படும். அவரைப்போலவே அவரிடம் தனுஷ் பேசுகிற காட்சி கைதட்டல்களை அள்ளுகின்றன. 1987 மற்றும் 2015 ஆகிய பிறப்புகளில் தனுஷ¨ம் அமைராவும் புதிதாகப் பிறந்து வருகிறார்கள். இவ்விரண்டிலும் கார்த்திக், ஆஷிஷ்வித்யார்த்தி, தலைவாசல்விஜய் போன்றவர்கள் ஒரேஆளாக இருக்கிறார்கள்.

1962 இல் தனுஷ் அமைரா காதலுக்கு எதிராக இருக்கும் தோழி ஐஸ்வர்யாதேவன் மற்றும் 62 இல் நாயகியின் அப்பாவாகவும் 2015 இல் மாமாவாகவும் முகேஷ்திவாரி ஆகியோரின் வேடங்கள் சுவாரசியத்தைக் கொடுப்பதைக் காட்டிலும் குழப்பத்தையே ஏற்படுத்துகின்றன. 2015இல் அவர்கள் வந்திருக்காவிட்டாலும் ஒன்றும் குறைந்துபோயிருக்காது.

மன்னர்காலத்தைத் தவிர மற்ற மூன்று காலங்களிலும் வருகிறார் ஜெகன். திரைக்கதை நகருவதற்குச் சிறியஅளவில் அவருடைய பங்களிப்பு தேவைப்படுகிறது. படத்தில் அவர் பேசுகிற ஒரு வசனம்தான் பெரியஅளவில் சர்ச்சையை ஏற்படுத்தியது.

ஒரு குறிப்பிட்ட சமுகத்தைக் குறித்துச் சொல்லப்படும் அதை ஆசைமச்சானுக்கு என்று மாற்றியதோடு கழுதை என்று தனுஷையும் சொல்லிவிட்டார்கள்.

ஹாரிஸின் இசையில் டங்காமாரி ஊதாரி பாடல் அதிர்வை ஏற்படுத்துகிறது. அதன்முன்னால் மற்ற பாடல்களால் நிற்கமுடியவில்லை.

காதல்பாடல்கள் கேட்கும்போது நன்றாக இருக்கின்றன. நினைவில் நிற்கவில்லை. மென்பொருள்துறையில் பணியாற்றும் இளைஞர்கள் நிர்வாகத்தின் சுயநலனுக்காக எப்படியெல்லாம் பலிகடா ஆக்கப்படுகிறார்கள் என்பதற்குச் சின்ன எடுத்துக்காட்டாக இந்தப்படம் அமைந்திருக்கிறது.

பூர்வஜென்மம் என்று குழப்பாமல் அதைப்பற்றி மட்டுமே இயக்குநர் பேசியிருந்தாரென்றால் இந்தப்படம் மிகவும் பரபரப்பான படமாகியிருக்கும் என்பது மட்டுமின்றி சமுதாயத்தில் விழிப்புணர்வு ஏற்படவும் வழி செய்திருக்கும்.