சிறுவர்களுக்கு மனநோய்…!

குடியேற்றவாசிகளுக்கான தடுப்பு நிலையங்களில் 2013 ஆம் ஆண்டு ஜனவரி மாதத்திற்கும் 2014 ஆம் ஆண்டு மார்ச் மாதத்திற்குமிடையில் தடுத்து வைக்கப்பட்டிருந்த 800 சிறுவர்களில் சுமார் மூன்றில் ஒரு பகுதியினருக்கு மனநோய் ஏற்பட்டுள்ளதாக மனித உரிமைகள் ஆணையகமொன்றின் அறிக்கை தெரிவிக்கின்றது.

ஆஸ்திரேலியாவுக்குள் மற்றும் அந்நாட்டின் கடற்கரைக்கு அப்பாலுள்ள தடுப்பு நிலையங்களில் தடுத்து வைக்கப்பட்ட மேற்படி சிறுவர்கள் அனைவரும் விடுதலை செய்யப்பட வேண்டும் என அந்த ஆணையகத்தின் அறிக்கை வலியுறுத்துகின்றது.

சிறுவர்களுக்கு எதிராக மேற்கொள்ளப்பட்ட குற்ற செயல் தொடர்பில் விசாரணை நடத்துவதற்கு ஆணையகமொன்று நிறுவப்பட வேண்டும் என அந்த அறிக்கையில் சிபாரிசு செய்யப்பட்டுள்ளது. ஆஸ்திரேலியாவின் அகதிகள் கொள்கைகள் தொடர்பில் அந்நாட்டு அரசாங்கம் குற்றச்சாட்டிற்கு உள்ளாகியுள்ளது.

குறிப்பாக புகலிடக்கோரிக்கையாளர்களின் அகதி அந்தஸ்து பரிசீலிக்கப்படும்வரை அவர்களை பபுவா நியூகினி மற்றும் தென் பசுபிக் தீவான நாயுறுவில் தடுத்து வைக்கும் ஆஸ்திரேலியாவின் திட்டம் கடும் கண்டனத்துக்கு உள்ளாகியுள்ளது.

ஆஸ்திரேலியாவுக்கு படகுகளில் வரும் புகலிடக் கோரிக்கையாளர்கள் தொடர்பில் கவலையடைந்துள்ள அந்நாட்டு வாக்காளர்களிடையே மேற்படி கடுமையான புகலிடக் கொள்கைகள் பிரபலம் பெற்று விளங்குவதாக கருத்துக் கணிப்பு வாக்கெடுப்புக்கள் தெரிவிக்கின்றன.

பொகொட்டின் சில்ட்றன் அமைப்பால் வெளியிடப்பட்ட சிறுவர்கள் தொடர்பான அறிக்கையையடுத்து ஆஸ்திரேலியாவின் குடியேற்றங்கள் தடுப்பு நிலைய வலைப்பின்னலில் குறிப்பிடத்தக்க மாற்றம் கொண்டு வரப்பட வேண்டும் என எதிர்க்கட்சியான தொழில் கட்சியும் கிறீன்ஸ் கட்சியும் மனித உரிமைகள் குழுக்களும் அழைப்பு விடுத்துள்ளன.