பாஹுபலியில் அனுஷ்கா நடித்த காட்சிகள் வராதா..? அதிர்ச்சி தகவல்..

இயக்குநர் ராஜமௌலி இரண்டு வருடத்திற்கும் மேலாக எடுத்து வரும் படம் ’பாஹுபலி’. பிரமாண்டமாக உருவாகிவரும் இப்படத்தில் ‘பிரபாஸ்’, ’அனுஷ்கா’, ’ராணா’ ஆகியோர் நடிக்கின்றனர். இதில் பிரபாஸுக்கு அம்மாவாக ஸ்ரீதேவியும், தளபதி கேரக்டரில் சத்யராஜியும் நடிக்கின்றனர்.

மேலும் இன்னொரு ஹீரோயினான தமன்னாவும் நடிக்கிறார். ஒரே நேரத்தில் தமிழ், தெலுங்கு என இரு மொழிகளிலும் தயாராகும் இப்படத்தில் தேவசேனா கதாபாத்திரத்தில் அனுஷ்கா நடித்துள்ளார். தற்போது அவர் நடிக்கும் பகுதி திரைக்கு வராது என்ற ஒரு தகவல் வெளியாகியுள்ளது. இது திரையுலகினரை அதிர்ச்சியில் ஆழ்த்தி உள்ளது.

பிரமாண்ட அரண்மனை, அதிகபட்ச நடிகர்களுடன் சுமார் ரூ. 100 கோடியில் உருவாகி வந்த இப்படம் தற்போது இரண்டு பாகங்களாக வெளிவரவுள்ளதாக கூறப்படுகிறது. முதல் பாகத்தில் தமன்னா நடிக்கும் காட்சிகள் மட்டுமே இடம்பெறும். அனுஷ்கா நடித்த காட்சிகள் இடம்பெறாது என கூறப்படுகிறது. இது ரசிகர்களுக்கு அதிர்ச்சியை தந்துள்ளது. இதன் வசன பகுதி முழுவதும் படமாக்கப்பட்டுவிட்டது. படமாகாமல் இருந்த 2 பாடல்கள் இம்மாதம் படமாகி வருகிறது.

இதுகுறித்து தமன்னாவிடம் கேட்டபோது, ‘பாஹுபலி படத்தில் இளவரசியாக நான் வருகிறேன். அது முதல் பாகமா என்வென்று எனக்கு தெரியாது. ஆனால் இப்படம் ரசிகர்கள் எதிர்பார்ப்புக்கும் மேலாக இருக்கும். இதை எப்படி வடிவமைத்திருக்கிறார்கள் என்பதை கற்பனை செய்துகூட பார்க்க முடியாது. இப்படத்தில் நான் நடித்தாலும் ராஜமெளலி இப்படத்தில் என்ன செய்கிறார் என்பது பற்றி எனக்கு எதுவும் தெரியாது. அவர் ஒருவருக்குத்தான் படம் பற்றிய முழு விவரமும் தெரியும்' என்றார்.