நம்ம பசங்க அப்படி செய்ய மாட்டாங்க.. அஜித் நம்பிக்கை..!

அஜித் நடிப்பில் சமீபத்தில் வெளிவந்த ’என்னை அறிந்தால்’ படம் இன்னும் திரையரங்களில் வெற்றிகரமாக ஓடிக்கொண்டிருக்கிறது. இப்படத்தில் அஜித்தின் நடிப்பும், வில்லனாக நடித்த அருண் விஜய் நடிப்பும், ரசிகர்களிடையே பரவலாக பேசப்படுகிறது.

மேலும் இப்படம் வெற்றிப்பெற்றுள்ளதால் இப்படத்தின் இரண்டாம் பாகத்தை கெள்தம் மேனன் எடுப்பாரா என்ற ஒரு ஆவல் ரசிகர்களிடையே உருவாகியுள்ளது. இந்நிலையில் இப்படத்தின் ப்ரோமோஷன் நிகழ்ச்சிக்காக சமீபத்தில் ஒரு பிரபல தொலைக்காட்சியில் கலந்துக்கொண்டார் அருண் விஜய்.

அப்போது படப்பிடிப்பில் நடந்த பல சுவாரஸ்ய தகவலை பகிர்ந்துக்கொண்டார். குறிப்பாக அஜித் தன் ரசிகர்கள் மீது வைத்திருக்கும் நம்பிக்கையை பற்றி கூறினார். இது குறித்து அவர் கூறுகையில் ‘நாங்கள் சென்னையின் ஒரு பிரபல பகுதியில் ஷுட்டிங் எடுத்த போது, அஜித் ரசிகர்கள் பலர் அங்கு கூடினர்.

படக்குழுவினரால் அந்த கூட்டத்தை கட்டுப்படுத்த முடியவில்லை. அப்போது அங்கு வந்த அஜித் தன் விரல் அசைவால் தன் ரசிகர்களை அமைதியாக்கினார். பிறகு படப்பிடிப்பு தொடங்கியது. அப்போது ஒரு உதவி இயக்குநர் வந்து சார் உங்க ரசிகர்கள் சத்தம் போட்டுகிட்டே இருக்காங்க என்று கூற, நம்ம பசங்க அப்படி செய்ய மாட்டார்களே, என்று மிகவும் நம்பிக்கையுடன் கூறினார் அஜித்’ என அவர் தெரிவித்துள்ளார்.