ஆரோன் ஃபின்ச் அபார சதம்… இங்கிலாந்தை வீழ்த்திய ஆஸி..!

உலகக் கோப்பை 2015-ன் இரண்டாவது போட்டி மெல்போர்ன் மைதானத்தில் நடைபெற்று வருகின்றது. இதில் இங்கிலாந்து மற்றும் ஆஸ்திரேலியா அணிகள் மோதியது.

டாஸ் வென்ற இங்கிலாந்து ஆஸியை பேட் செய்ய அழைத்தது. தொடக்க ஆட்டக்காரர்களான வார்னர் மற்றும் ஃபின்ச் இருவரும் அணிக்கு நல்ல ஆரம்பத்தை தந்தனர். ஆனால் அணியின் ஸ்கோர் 57ஆக இருந்த போது வார்னர் 22 ரன்களுடன் ஆட்டமிழந்தார்.

தொடர்ந்து இறங்கிய வாட்சனும் முட்டை ரன்களுடன் வெளியேற அதிர்ச்சியில் உறைந்தனர் ரசிகர்கள். தொடர்ந்து களமிறங்கிய ஸ்மித்தும் 5 ரன்களில் வெளியேறினார். பின்னர் களமிறங்கிய கேப்டன் பெய்லி ஃபின்ச்சுக்கு நன்றாக கம்பெனி கொடுக்க சிறப்பாக விளையாடினர். அதிரடியாக ஆடிய ஃபின்ச் 135 ரன்களில் வெளியேற, பெய்லி 55 ரன்னில் அவுட் ஆனார்.

அடுத்து மேக்ஸ் வெல் 66 ரன், மார்ஷ் 23, ஹேடின் 31 என வெளியேற கடைசி ஓவரில் ஜான்சன் மற்றும் ஸ்டார்க் டக் அவுட் ஆகி வெளியேறினர். 50 ஓவர்களில் ஆஸி அணி 9 விக்கெட்டுகளை இழந்து 342 ரன்கள் எடுத்தனர். இங்கிலாந்து சார்பில் ஃபின் 5 விக்கெட்டுகள் எடுத்தார். அதில் கடைசி ஓவரின் ஹாட்ரிக்கும் அடங்கும்.

பின்னர் களமிறங்கிய இங்கிலாந்து அணி வீரர்கள் சொற்ப ரன்களுடன் சீரான இடைவெளியில் விக்கெட்டுகளை இழந்து கொண்டிருந்தனர். எனினும் நிலைத்து ஆடிய டெய்லர் மட்டும் 98 ரன்கள் எடுத்து கடைசி வரை ஆட்டமிழக்காமல் இருந்தார்.

கடைசி வரை போராடிய இங்கிலாந்து அணி 41.5 ஓவர்களில் 231 ரன்கள் எடுத்து 111 ரன்கள் வித்தியாசத்தில் தோல்வியடைந்தது. ஆஸி சார்பில் மார்ஷ் 5 விக்கெட்டுகள் எடுத்தார். ஜான்சன் மற்றும் ஸ்டார்க் இருவரும் தலா 2 விக்கெட்டுகள் எடுத்தனர்.