இதுதாங்க விஜய்..!

ஒரு நடிகர் என்று இல்லாமல் ரசிகர்களுடன் சேர்ந்து சில சமூக சேவைகளில் ஈடுப்பட்டு வருவதுடன், தன்னை நாடி வருபவர்களுக்கு தன்னால் முடிந்த உதவிகளையும் செய்துவருகிறார் விஜய். அது மட்டுமல்லாமல், கஷ்டப்படும் தன் ரசிகர்களுக்கு தானாகவே தேடிச்சென்று உதவிகளை செய்து வருகிறார்.

இவர் சமீபத்தில் சென்னையிலுள்ள ஆதரவற்றோர் இல்லத்திலுள்ள 3 குழந்தைகளையும் வரவழைத்து சந்தித்ததோடு, அவர்களுடன் போட்டோ எடுத்துக் கொண்ட சம்பவம் விஜய்யின் ரசிகர்களை நெகிழச் செய்துள்ளது. இதில் என்ன நெகிழ்ச்சி? நடிகர் என்றால் போட்டோ எடுக்க தானே செய்வார்கள் என்று கேட்கிறீர்களா..?

சம்பந்தப்பட்ட அந்த 3 குழந்தைகளும் இரத்தப் புற்றுநோயால் பாதிக்கப்பட்டவர்கள். தங்களுடைய வாழ் நாளை எண்ணிக்கொண்டிருக்கும் அவர்களிடம் உங்களின் ஆசை என்ன என்று கேட்டபோது, அவர்கள் நடிகர் விஜய்யை நேரில் சந்தித்து அவருடன் போட்டோ எடுக்க வேண்டும் என சொன்னார்களாம்.

இதை அந்த ஆதரவற்றோர் இல்லத்தைச் சேர்ந்தவர்கள் விஜய்யின் கவனத்திற்கு கொண்டு செல்ல, உடனடியாக அவர்களை நேரில் அழைத்து அவர்களுடன் சிறிது நேரம் உரையாடிவிட்டு, போட்டோவும் எடுத்துக் கொடுத்திருக்கிறார். அவரைச் சந்தித்த அந்த 3 குழந்தைகளும் சந்தோஷமாக அந்த நிமிடங்களைக் கழித்தார்கள்.